"A Terrible Beauty is Born" - W.B. Yeats

2002-08-06T11:15:00.000Z

Gaman að þessu: var staddur í bókabúð í Mílanó. Tók að fletta bók eftir írska blaðamanninn og þjóðfélagsrýninn Tim Pat Coogan, Wherever Green is Worn - The Story of the Irish Diaspora, sem kom út í hitteðfyrra. Nema hvað, haldiði ekki bara að ég hafi fundið nafn mitt í indexnum aftast! Þá sér Coogan ástæðu til að minnast á mig á bls. 18 í umfjöllun um heimsókn hans hingað til Íslands fyrir nokkrum árum en ég tók viðtal við hann fyrir Moggann.
Coogan hefur annars skrifað fjölda metsölubóka, þ.e. ævisagna, m.a. um slíkar hetjur sem Michael Collins og Eamon de Valera. Þá hefur hann skrifað bækur um IRA og The Troubles (á Norður-Írlandi). Þjóðþekktur maður á Írlandi í meira lagi.

2002-05-15T16:38:00.000Z

Ég sé að mér hefur tekist að ergja Stefán Pálsson með ummælum mínum um það, sem Sara Flounders hafði að segja í Silfri Egils á sunnudag. Stefán segir:

"Menn geta verið sammála því sem Sara Flounders hefur að segja eða ósammála, en það er ótrúlegur hroki þegar blaðamenn sem skotist hafa í tvær til þrjár pakkaferðir á vegum NATO telja sig geta blásið á skoðanir hennar með þeim orðum að "svona fólk sé ekki í jafnvægi". - Nú tel ég mig þekkja nógu vel til á Mogganum að vita að stórmennskubrjálæði er ekki forsenda þess að blaðamenn séu ráðnir þar til starfa,... en það hjálpar."

Nú veit ég ekki að hverju Stefán er að ýja, t.d. varðandi "pakkaferðir á vegum NATO". Kannast ekki við að hafa farið í slíkar ferðir.
Veit Stefán betur? Heldur hann t.d. að ég hafi verið í "pakkaferð" á vegum NATO í Kosovo? Það er best ég leiðrétti þann misskilning, ég starfaði um níu mánaða skeið hjá Öryggis- og samvinnustofnun Evrópu (ÖSE) í Kosovo. Þetta var semsé býsna löng pakkaferð.

Ég held líka að ég geti alveg lýst skoðunum hér á málflutningi Söru Flounders án þess að það tengist sérstaklega vinnustað mínúm.

Loks er athyglisvert að sagnfræðingurinn Stefán getur ekki vísað rétt í ummæli mín. Hið beina "kvót" sem hann hefur eftir mér hljómar reyndar svona: "Fólk sem sér ekkert nema samsæri er ekki alveg í jafnvægi."
Held ekki að ég þurfi að þjást af stórmennskubrjálæði til að hafa þótt framlag Flounders lítt merkilegt. En ég gæti haft rangt fyrir mér.

2002-05-15T15:28:00.000Z

Það er rétt hjá Agli Helgasyni þessi frétt úr The Independent er afar áhugaverð. Miðað við frásögn Roberts Fisks var það víst ekkert sérstaklega klókt af honum að tala gagnrýnið um afskipti Bandaríkjamanna í Mið-Austurlöndum svo skömmu eftir árásirnar 11. september sl.

Annars er ég að glugga í nýja bók eftir Joe Klein, sem heitir The Natural - The Misunderstood Presidency of Bill Clinton. Hér er linkur í dóm NYT um hana. Hún virðist athyglisverð, kannski ekki síst vegna þeirrar innsýn sem Klein auðvitað hafði. Klein er auðvitað þekktur fyrir að hafa ritað bókina Primary Colours - þó að hann hafi upphaflega ritað hana undir dulnefninu Anonymous þá komst upp um hann um síðir.

2002-05-15T11:46:00.000Z

Það var nóg að gera fyrir mig á NATO-fundinum í gær. Gaman að þessu. Svo drattaðist ég á fætur kl. 6 í morgun til að "covera" fund þeirra Halldórs Ásgrímssonar og Colins Powells. Náði meira að segja að koma spurningu á utanríkisráðherrann bandaríska.

Þetta fer í úrklippubókina (s.s. þá sem ég geymi í höfði mínu). Ekki á hverjum degi sem maður varpar fram spurningum til slíkra manna.

Annars sá ég að Pressan birti þetta í gær, upp úr Viðhorfi mínu í þriðjudagsblaðinu:

Ummæli dagsins
„Er raunar merkilegt að Davíð Oddsson forsætisráðherra hefur sagt, að hann vilji ræða Evrópumálin á málefnalegum nótum og sanngjörnum, en þó nefnir hann sjaldnast nema hugsanlega galla, lætur nánast sem kostirnir séu engir. “
Davíð Logi Sigurðsson blaðamaður
(Morgunblaðið)

Ekki á hverjum degi heldur sem maður er talinn eiga ummæli dagsins!! Ekki einu sinni hinir háu herrar, sem hingað til lands voru komnir, gátu skákað mér!

Sussumsvei, er það nú vitleysa.

XXXXXXXXXXXXXXXX

Ég held að maður þurfi barasta ekkert að fara að sjá nýju Star Wars myndina. Hún fær alveg herfilega útreið í The Washington Post í dag.

2002-05-13T15:40:00.000Z

Spurning annars hvort maður bregður sér í kokkteil hjá borgarstjóra í kvöld. Fékk boðsmiða þegar ég sótti blaðamannapassann áðan í Tæknigarð vegna NATO-fundarins, en það er búið að úthluta mér verkefni á fundinum á morgun. Fer semsé og fylgist með viðræðum NATO og Rússa, sem ætti að geta verið spennandi.

Á ekki alltaf að sækja kokkteila, ef maður kemst í slíkt?

2002-05-13T15:37:00.000Z

"Hann þekkir ekki Moggann og þá sem þar starfa," segir Sverrir Jakobsson í umfjöllun sinni um einn fyrirlesara friðarráðstefnunnar um helgina. Maður á líklega að túlka þetta sem vantraustsyfirlýsingu - en á maður eitthvað að vera að taka mark á fólki sem kallar umfjöllun um yfirlýsingar yfirmanna NATO "áróður" en atburði eins og áðurnefnda ráðstefnu "frétt"?

Annars fannst mér framlag Söru Flounders í Silfri Egils ekki merkilegt. Fólk sem sér ekkert nema samsæri er ekki alveg í jafnvægi. Umfjöllun hennar um Balkanskagann var út í hött, en ég hef svo sem heyrt þetta áður. Á einhverja bók heima, þar sem fólk af sama sauðarhúsi hellir úr skálum reiði sinnar vegna umfjöllunar fjölmiðla um Kosovo-stríðið. Harold Pinter leikritaskáld skrifar formála og gengur alltof, alltof langt...

En ef ég er ekki vinstrimaður, eins og þetta blessaða fólk, sem sér heiminn þessum augum, hvað er ég þá?
Sannarlega er ég ekki Heimdellingur - held ég hafi ekki séð neitt í kosningabaráttunni hér í Reykjavík, sem er jafn líklegt til að hafa afgerandi áhrif á afstöðu mína, og innlegg Heimdellinga í göngu R-listans um miðbæ Reykjavíkur á sunnudag. Það var sagt frá þessu á Stöð 2 í gær og einhvern veginn efast ég um að þeir sem stýra kosningabaráttu D-listans hafi verið ánægðir. Varla trúa þeir því að fólk ákveði að kjósa D út á svona strákapör?

XXXXXXXX

Talandi um Silfur Egils, þá hefði mér fundist að Egill hefði getað valið viðmælendur sína betur í umræðunni um fjölmiðla á Íslandi. Það var ekki heil brú í því sem Herdís Þorgeirsdóttir var að segja og þó að þeir Ásgeir Friðgeirsson og Hrafn Jökulsson hafi ekki staðið sig illa finnst manni að ástæða hefði verið til að hafa einhverja frá "alvöru" miðlunum (helst þungaviktarmenn), DV eða Morgunblaðinu.

2002-05-10T21:30:00.000Z

Annars hafa Evrópumál og Árnamál verið helst í fréttum í vikunni. Það væri nú að bera í bakkafullan lækinn að fjalla um það hér, nóg ræðir maður nú um þau mál samt við bæði vini og vinnufélaga.

XXXXXX

Á morgun halda tíu ára stúdentar úr FB smá veislu á Astro. Við höfum að vísu reynt að láta þau boð út ganga að ekki sé bráðnauðsynlegt að menn hafi útskrifast vorið 1992, að gaman væri að fá að sjá aðra, sem t.d. útskrifuðust önn áður/síðar, enda mikilvægara að fá gott partí heldur en halda sig í formlegheitin. Ekkert er nú bekkjarkerfið í FB og því stundum annað sem réði því, hverjir urðu vinir manns og kunningjar, heldur en beinlínis með hverjum þú útskrifaðist.

En semsé, þetta ætti að gera orðið gaman. Það verður fullt af fólki sem maður ekki hefur hitt um árabil.

XXXXXX

Það vantaði víst linkinn á dóminn um Spiderman. Voilá!

2002-05-10T20:43:00.000Z

Fyrst ég er farinn að tala um Spiderman þá er best að vitna líka til dóms NYT um hana. Þeir eru sammála mér þar um aðalleikarann.
Að vísu er það með myndir sem þessa, að fyrri hlutinn er alltaf betri en sá síðari - því að maður veit að síðari hlutinn er um uppgjörið milli "góða" gæjans og þess vonda. Og alltaf veit maður nú hvernig það fer!

2002-05-10T20:37:00.000Z

Ekki fær nú nýja Star Wars-myndin ýkja góða dóma hjá stórblaðinu The New York Times. Raunar sagði vinur minn mér, sem hefur séð myndina, að hún sé vonbrigði. Sagan sé klén. Það fannst mér líka um þá fyrri (semsé þá fyrri í seinni umferð - en sem samt á að gerast fyrr en hinar þrjár!) - hún var illa leikin og framvindan klúðursleg.

Sá hins vegar Spiderman í gær og fannst hún bara fín! Kannski aðeins of löng - en það slapp. Kannski er það Tobey Maguire, sem er góður leikari. Það gátu menn séð í The Ice Storm, The Cider House Rules og Wonder Boys.

2002-05-08T13:14:00.000Z

Þetta er einkar vel heppnaður pistill hjá Agli Helgasyni. Forsætisráðherra biður um málefnalega umræðu um Evrópumál - en gefur síðan til kynna að þeir hljóti að vera galnir sem vilja ganga í ESB. Geta varla talist mjög málefnaleg ummæli.

2002-05-07T23:36:00.000Z

Annars hef ég þær upplýsingar frá skrifstofu stjórnmálafræðiskorar að 29 hafi skráð sig í námskeið mitt og Arnars Þórs Mássonar, Þjóðernishyggja og þjóðernisátök, sem við munum kenna við Háskólann á vorönn 2003. Það er hreint ekki svo slæmt.
Og að öllum líkindum munum við þurfa að drepa víða niður, m.a. í Mið-Austurlöndum, þó að Kosovo og Norður-Írland séu nú meira á mínu sérsviði, ef svo má að orði komast.

Við kenndum námskeiðið á haustönn 2000 og það gekk svona bærilega, þó að ég hafi aldrei kennt áður. Stakk að vísu frá allri prófayfirferð og skildi Arnar eftir í þeirri súpu - friðargæslan í Kosovo kallaði.

2002-05-07T23:20:00.000Z

Hasar á vaktinni í kvöld - allt farið af stað í Mið-Austurlöndum að nýju?

Þetta er annars grátlegt. Þegar annar aðilinn sýnir smá vit og lætur undan þrýstingi - hættir hernaðaraðgerðum - tekur hinn upp þráðinn þar sem frá var horfið og hleypir öllu í bál og brand á nýjan leik.
Sýnir best hvernig það eru ekki hreinar línur í þessu, þó að samúð manna hafi réttilega verið með Palestínumönnum að undanförnu. Þessi árás í kvöld er þó hins vegar engan veginn til framdráttar, og raunar alveg ótrúlegt að gera svona núna.

Svo voru einhver flugslys og svona - eintómur dauði og djöfull á forsíðunni á morgun. Því miður.

2002-05-07T14:32:00.000Z

Á sunnudag fór ég á borgarafundinn í Ráðhúsinu, þar sem fulltrúar framboðanna í Reykjavík stóðu fyrir máli sínu. Þetta var hin versta samkunda. Ekki bara af því að spurningar og svör voru manni lítil aðstoð við að ákveða hvað skuli kjósa, heldur vegna MORFÍS-stemmningarinnar úti í sal. Þar klöppuðu menn í gríð og erg fyrir sínu fólki, í viðleitni til að kaffæra stuðningsmenn andstæðingsins.
Ég sat sem fastast og klappaði hvergi. Leið eiginlega hálf illa yfir öllu saman - hélt ekki að þetta yrði sandkassaslagur!

Sýnir hvað ég er naív.

2002-05-07T14:27:00.000Z

Ég hef aldrei spilað snóker af neinu marki enda er leikurinn fjári erfiður. Menn halda að það sé enginn munur á snóker og billjarð en komast síðan gjarnan að öðru, eiga í erfiðleikum með að hitta kúlurnar í snóker, hvað þá að koma þeim niður!
Ég bjó veturinn 1994-1995 á Írlandi og datt í það um páskana 1995 að horfa á heimsmeistarakeppnina í snóker, sem BBC sýnir alltaf beint. Þá komst ég að því að þetta er hið skemmtilegast sjónvarpsefni. 1996-1997 var ég í Belfast og datt þá í það sama fyrir algera tilviljun. Held það hafi verið þá sem Ronnie O'Sullivan kláraði 147 (þ.e. kláraði borðið með hæstu mögulegu stigatölu) á einhverjum tæpum fimm mínútum. Ekkert smá góður.

En ég hélt samt alltaf með Peter nokkrum Ebdon fyrir einhverra hluta sakir. Get ekkert útskýrt það, er ekki einu sinni viss um að hann teljist neitt sérstaklega flínkur miðað við O'Sullivan eða Stephen Hendry. Hann er meira svona í stíl við Steve Davis, varkár og "leiðinlegur" spilari. Hvað um það - ég ákvað bara 1995 að þetta væri minn maður og þar við sat.
Svo gat hann aldrei neitt. Fyrr en í ár. Hann lagði Hendry í úrslitaleiknum í gær. Hans tími er kominn.

XXXXXXXXXXXX

Sé að Sverrir Jakobsson hefur farið í einhverja fýlu yfir skrifum á Pressunni um þessi "blogg" hans. En við hverju búast menn - halda þeir að hægt sé að formæla fólki úti í bæ á Netinu án þess að menn þurfi að standa nokkur skil á því? Verð að segja, að mig hafði undrað þessar blammeringar á Stefán Jón Hafsten og aðra.

2002-05-04T13:27:00.000Z

Er páfinn kaþólskur? Hér er ágæt grein um vanda kaþólsku kirkjunnar sem mátt hefur taka á fjölda hneykslismála að undanförnu. Ég fylgist jafnan með fréttum um þetta efni eftir veturinn sem ég eyddi við St Patrick´s College í Maynooth á Írlandi 1994-95 en í gegnum tíðina hefur Maynooth gegnt hlutverki höfuðstöðva kaþólsku kirkjunnar á Írlandi. Merkilegt fyrir bersyndugan Íslending frá spillingarbælinu Reykjavík (a.m.k. ef eitthvað er að marka nektarstaðaumræðuna undanfarna daga) að dvelja í svona bæ.

Í gærkvöldi fór ég á barinn Áslák í Mosfellsbæ. Var ekki mín hugmynd, trúið mér, en svo sem fyndið að breyta stundum til. Um gleðina þar bera fæst orð minnsta ábyrgð.

2002-05-03T18:53:00.000Z

Bertie karlinn virðist ætla að hafa þetta á Írlandi. Sannkallaður teflon-maður; alinn upp af Charlie gamla Haughey - þeim spilltasta af öllu spilltu - en geldur ekkert fyrir það. Enda er hann svo fjarska vingjarnlegur og almennilegur, skarar fram úr í stjórnmálaflórunni á Írlandi.

Ég sé að íþróttamálaráðherrann írski, James McDaid, er í einhverjum vanda. Ekki í fyrsta sinn sem hann talar óvarlega, rámar í eitthvað hneyksli á níunda áratugnum þar sem hann talaði vingjarnlega um lýðveldissinna á Norður-Írlandi. Annars tók ég viðtal við hann þegar hann kom hingað til Íslands sumarið 1998 eða 1999. Vingjarnlegasti karl - mig minnir að fyrirsögnin í Mogganum hafi verið eitthvað á þá leið að það væri fleira að finna á Írlandi en búálfa, þ.e. leprechauns. Hefur annars einhver annar en ég séð hörmulega hryllingsmynd sem hét einmitt þetta, Leprechaun, og skartaði Jennifer Aniston í aðalhlutverki?

XXXXXXXXXXXXXXX

Ibrahim Rugova kom fyrir stríðsglæpadómstólinn í Haag í dag og vitnaði gegn Milosevic. Rugova er furðuleg týpa. Þegar ég var í Kosovo voru allir sammála um það að hann væri búinn að vera, orðinn pólitískt "irrelevant". Sennilega gildir það enn, þó að ég sé ekki alveg eins inni í málum nú, eftir að heim kom. Hann ku drekka ansi stíft - því var fleygt að þegar friðarviðræður stóðu yfir í Rambouillet í Frakklandi snemma árs 1999 hefði hann verið nánast blindfullur allan tímann.

XXXXXXXXXXXXXXX
Það er komin helgi. En maður er samt ekki alveg sloppinn - tók að mér að refera fund sem fer fram á morgun um bók Vals Ingimundarsonar, Uppgjör við umheiminn. Ætlaði hvort sem er að fara á fundinn - eins gott að fara á launum!

2002-05-03T00:43:00.000Z

Maður verður að reyna að horfa á Stoke-leikinn eftir viku - þetta var glæsilegur sigur á Cardiff í gær.

2002-05-02T20:48:00.000Z

Nú fer að styttast verulega í veisluna sem við tíu ára stúdentar frá FB ætlum að halda í tilefni tímamótanna.
Partýið verður á Astro laugardaginn 11. maí.

Skrýtin tilfinning að vera að verða tíu ára stúdent - svona rétt eins og það var skrýtið að vera þrjátíu. Þetta eru hlutir sem koma bara fyrir annað og miklu eldra fólk!

Það var gaman á sínum tíma að vera í FB. Og það er ýmislegt sem stendur upp úr - t.d. Vestmannaeyjaför haustið 1990 sem endaði í blöðunum! Fæst orð bera minnsta ábyrgð um þau mál.

Þá um vorið höfðum við reyndar einnig verið í blöðunum - þegar frumsýningarpartý leiklistarfélagsins endaði með aðeins of mikilli gleði... semsé með áfengisdrykkju nokkurra leikara inni í skóla morguninn eftir. "Hóflega drukkið vín gleður mannsins hjarta," man ég að Loki á baksíðu DV sagði um þau mál.
Við vorum annars að setja upp leikrit eftir Sigurð Pálsson sem hét Hlaupvídd Sex. Ég lék hlutverk Ásláks en aðrir, sem léku þarna, voru t.d. Jóhann G. Jóhannsson leikari, sem er í forsvari fyrir leikara í landinu þessa dagana, ef ég man rétt. Jói lék Adolf Hitler!

Hvað annað? Jú, ég sat í nemendaráði 1990-1991, tapaði síðan formannskosningu þá um vorið fyrir Ingvari Sverrissyni, kosningastjóra hjá R-listanum (ég er kominn yfir það). Keppti einu sinni í MORFÍS en við töpuðum glæsilega fyrir VMA á Akureyri - man að það voru einhver eftirmál að því, held við höfum kært aðaldómara keppninnar. Hann dæmdi ekkert meira þann veturinn - en hefur jafnað sig á því og er núna aðstoðarmaður Valgerðar Sverrisdóttur, iðnaðar- og viðskiptaráðherra.
Svo töpuðum við í undanúrslitum Gettu betur - einnig á Akureyri en fyrir MA. Það var hrikalegt - munaði engu...

A trip down memory lane....

2002-04-30T19:07:00.000Z

Áhugaverð fréttin í dag um nýja skoðanakönnun, sem var unnin fyrir Moggann. Þar segir að ef aðeins sé horft til D-lista og R-lista fái D-listi 45,6% og R-listi 54,4% sem maður myndi nú telja þokkalega afgerandi. En síðan segir: "Munurinn á fylgi þeirra er á mörkum þess að geta talist tölfræðilega marktækur, en vikmörk á fylgistölum framboðanna tveggja eru um 5% til eða frá."

Nú efa ég ekki að þetta síðasta er rétt. En þá er væntanlega aldrei neitt að marka þessar kannanir, eða hvað?!!

Talandi um kosningarnar. Ég sé að skotgrafarhermenn Sjálfstæðisflokksins eru komnir af stað, sbr. grein Jakobs F. Ásgeirssonar í Mbl. í dag og síðan lesendabréfið "Látum ekki blekkjast" eftir Leif N. Karlsson.
Skil ekki þetta fólk - það er alveg klárt, að ef ég er eitthvað hikandi um hvað ég eigi að gera þá hafa svona skrif, svona skítkast, þau áhrif á mig að ég kýs umsvifalaust R-listann!!

Það sama gerðist seinast og í forsetakosningunum 1996 - það virðist alltaf hlaupa upp til handa og fóta eitthvað fólk sem hreinlega sér rautt. Það ætti hins vegar að átta sig á því að offors er ekki til þess fallið að sannfæra þá sem hikandi eru.

XXXXXXXXXXX

Ég sé að þetta eru ekki glataðir draumar - það er raunverulega ný plata frá Peter Gabriel á leiðinni. Hún ku eiga að heita Up. Reyndar hefur platan verið lengi í bígerð. Ég man t.d. þegar REM gaf út plötu með þessu sama nafni fyrir þremur árum, þá höfðu þeir rætt við Gabriel enda stefndi snillingurinn þá að því að koma plötunni út á svipuðum tíma. Af því varð ekki og augljóst er að Gabriel hefur viljað vanda sig voða vel. Það er auðvitað ágætt - en fyrr má rota en dauðrota, US-platan kom út 1992!!!

Raunar hefur komið efni frá Gabriel síðan þá en ekki eiginleg breiðskífa. Nú síðast kom út plata með tónlist úr kvikmynd sem heitir Rabbit Proof Fence og er áströlsk. Hef ekki komið höndum yfir hana ennþá en það ku vera gott efni. Nú - svo samdi Gabriel líka ágæta tónlist fyrir Þúsaldarhöllina í London, sem nú er öll.

XXXXXXXXXX

Aðalfundur Blaðamannafélagsins er í kvöld. Ekki gæfuleg tíðindi sem berast á þessum degi - uppsagnir á DV. Augljóst að það kreppir verulega að á fjölmiðlamarkaði.

2002-04-30T13:24:00.000Z

Allir sem hafa einhvern áhuga á enska boltanum verða að leigja sér myndina Mike Bassett: England Manager sem er nýkominn á vídeóleigur. Ótrúlega fyndin, einkum fyrir þá sem einhverja hugmynd hafa um í hvað verið er að vísa (Stuart "psycho" Pearce, Graham Taylor, David Beckham, Paul Gascoigne etc.)

Annars er árangur Leeds engan veginn viðunandi í vetur. Þeir verða að gera betur á næsta tímabili, það er alveg ljóst.

2002-04-27T10:38:00.000Z

Það er óhætt að segja að maður fái ætíð dálítið "kick" út úr því að "skúbba" í blaðamennskunni. Einkum ef maður hefur þurft að hafa svolítið fyrir því að vinna úr málinu, sem um er að ræða.
Málið með íslensku stúlkuna, sem kólumbískur hershöfðingi bendlaði við Írska lýðveldisherinn (IRA) og raunar alþjóðleg hryðjuverk almennt, er eitt þessara mála. Framan af hélt ég nú bara ekki að ég myndi hafa uppi á henni. En það tókst og afraksturinn getur að líta í Mogganum í dag, laugardag. Ekki er verra að vita af því að aðrir fjölmiðlar voru að reyna að finna hana - en tókst ekki. Verða því að láta sér duga að lesa upp úr Mogganum, sbr. tíu-fréttir Bylgjunnar núna í morgun.

Ég vona annars að Bandaríkjamenn byggi ekki alla sína baráttu gegn hryðjuverkum á jafn ótraustum gögnum og þessum vitnisburði kólumbíska hershöfðingjans. Þá erum við líklega öll í bráðri hættu.

2002-04-26T17:37:00.000Z

Brjálað að gera í dag - og að koma helgi. The Economist kominn í hús og því lestrarefni helgarinnar ákveðið. Le Pen á forsíðunni - flott mynd eins og alltaf hjá blaðinu. Hvað sem um pólitík The Economist má segja þá er þetta besta vikufréttaritið að mínu mati. Blöð eins og Time og Newsweek eru svo ofur-amerísk og stundum jafnvel hálf glamúrleg eitthvað.

Ný skoðanakönnun sýnir að D-listi sé kominn með meira fylgi í Reykjavík en R-listinn. Ekki gefur þetta nú góðan vitnisburð um staðfestu kjósenda!

Það er annars augljóst að R-listinn hefur verið einum of værukær, hefur gefið sjálfstæðismönnum of mikið forskot í kosningabaráttunni. Nú þegar þau eru líka farin af stað hjá R-listanum skýrast línur sjálfsagt enn frekar. Sem fyrr ætla ég að þrjóskast við að gera upp hug minn... þó að ég væri hræsnari ef ég viðurkenndi ekki að ég hef undanfarnar vikur hallast að R-listanum. En svei mér þá, ef ég gæti ekki bara fallist á hitt.

Úpps! Þar hitta mig heldur illa heima fyrir orð mín um staðfestu kjósenda!!!

2002-04-25T20:11:00.000Z

Ég fer alveg hamförum hérna í dag.
Var að skoða heimasíðu Sameinuðu þjóðanna. Veslings lögfræðingarnir sem tóku UN-prófið hérna heima í fyrra - niðurstaða liggur ekki ennþá fyrir!!

Prófið var haldið snemma í febrúar 2001 og menn skráðu sig til þátttöku á ólíkum sviðum. Sjálfur tók ég þátt í Political Affairs-hlutanum og vissi í október að mér yrði boðið í munnlegt viðtal, og síðan í desember að ég hefði komist alla leið.
Þeim hefur hins vegar ekki ennþá tekist að ljúka yfirferð á prófum þeirra sem tóku lagahlutann, hvað þá að farið sé að kalla fólk í viðtöl!

Það er sko engin þriggja vikna skilaskylda á prófúrlausnum þarna - eða er það ekki annars krafan í háskólanum? Fyndnast er að um leið og próftíma var lokið - þetta voru þrælerfið próf, tvisvar fjögurra tíma próf, og ég hef aldrei á skólaferli mínum lent í því áður að ná ekki að klára próf - var úrlausnum pakkað niður í kassa og send með DHL (eða einhverju álíka) til New York.
Þetta var á föstudegi en úrlausnirnar urðu að fara STRAX!

Það er svo sem allt eftir þessu - viðtalið mitt var um miðjan nóvember en ég er ekki ennþá farinn að fá endurgreiddan fararkostnaðinn til New York.

X X X X

Er að lesa bókina Regeneration eftir Pat Barker. Þetta er fyrsta bókin í Regeneration-trílógíunni en bækurnar fjalla um hermenn úr fyrri heimsstyrjöld sem hafa orðið fyrir andlegu áfalli og dveljast á "hressingarhæli" í Skotlandi. Bækurnar eru um þá og lækna þeirra. Þetta er m.a. byggt á sögulegum heimildum og afar vel skrifað.
Hef áður lesið þriðju bókina, The Ghost Road, en fyrir hana fékk Barker Booker-verðlaunin árið 1995 að ég held. Hún var hreint afbragð og Regeneration er bara hreint ekkert síðri. Og mér sýnist að það skemmi ekkert að hafa byrjað á vitlausum enda.

Og bíó - ég fór að sjá Jimmy Neutron um daginn með systursyni mínum! Held hann hafi skemmt sér - þetta varð hins vegar eins og svona þynnkubíó fyrir mig.

2002-04-25T19:47:00.000Z

Maður verður alltaf forvitinn þegar íslensk nöfn eru tengd fréttaviðburðum sem gerast úti í hinum stóra heimi. The Guardian segir frá því í dag að íslensk kona hafi verið handtekin ásamt nokkrum Írum í Kólombíu í fyrra. Henni og samferðamanni hennar var sleppt en svo eru það þessir þrír, sem dúsa enn í fangelsi og fullyrt er að hafi verið erindrekar Írska lýðveldishersins, IRA, sem til Kólombíu voru komnir til að þjálfa skæruliða FARC-sveitanna.

Ég ætla ekkert að nefna þessa stúlku en fréttin er hér, ef einhver hefur áhuga. Ég fletti nafninu upp í þjóðskrá og þar er stúlkan sögð búsett í Danmörku.

Ef maður fer að fabúlera þá dettur manni í hug að stúlkan hafi orðið ástfangin af ungum Íra - sem síðan reyndist hafa tengsl við IRA. Þau lent í "ævintýrum" í fjarlægum löndum.
Hljómar eins og léleg ástarspennusaga... eða kannski bara eins og söguþráður bókarinnar Með kveðju frá Dublin eftir Árna nokkurn Bergmann!!

2002-04-25T18:40:00.000Z

Annars er þetta hrun ITV í Bretlandi hið versta mál. Í vikunni neyddist Torquay til að segja Roy McFarland upp sem stjóra, enda gat hann eðlilega ekki sætt sig við kauplækkun eftir að hafa tryggt sæti liðsins í 3. deildinni ensku (19. sæti er viðunandi fyrir klúbbinn - metnaði verður alltaf að fylgja raunsæi!). Allt kom það til af því að víst þykir að tekjutap liða eins og Torquay verði mikið nú þegar ITV er farið á hausinn.

Lincoln City grípur til svipaðra ráðstafana í dag, sé ég, og segir upp sínum stjóra, Alan nokkrum Buckley. Hann hefur verið bæði hjá Grimsby og WBA. Stóð sig bærilega hjá því fyrrtalda, allavega er hann var þar í fyrra skiptið.

2002-04-25T18:34:00.000Z

Deiglan reynir í dag að sýna fram á að Yasser Arafat sé enginn engill, ekki frekar en Ariel Sharon. Það er nú svo sem gott og blessað. Ég ætla ekkert að fjölyrða um sekt og sakleysi í þessari síðustu lotu deilunnar í Mið-Austurlöndum þó að mér þyki ljóst að það hallar verulega á Palestínumenn.
Mér finnst þó eins og málflutningur hafi verið eilítið einhliða að undanförnu og ég var því að reyna mitt ítrasta til að spyrja þá Svein Rúnar Hauksson og Viðar Þorsteinsson frá Félaginu Ísland-Palestína krítískra spurninga í viðtali sem ég átti við þá í Mogganum í fyrradag, 23/4.
Veit ekki hvernig til tókst. Veit bara að það gerir engum málstað gott ef menn gæta ekki jafnvægis í umfjöllun sinni.

Talandi um Moggann. Ég sé að Ármann hefur veitt þessari færslu minni frá því í gær athygli (ég er að gefa mér þetta af samhenginu - hann nefnir það ekkert sjálfur). Hann segir að Mogginn fengi jafnvel aðra stjörnu frá sér ef við færum að koma út á mánudögum. En ættum við ekki fyrst að fá hálfa fyrir að vera farin að koma út daginn eftir hátíðir?
Það væri nú varla nema sanngjarnt, eða hvað?

2002-04-24T22:41:00.000Z

Ég get nú ekki annað en lýst ánægju minni með þessa stjörnu sem Ármann Jakobsson veitir fréttastofu Moggans (sjá færslu 17/4) ... þó að mér finnist hann nú setja okkur heldur langt fyrir aftan fréttastofu útvarps, sem hann gefur fjórar. Bót er í máli, að engir aðrir miðlar fá stjörnu.

Annars fer nú vaktinni að ljúka hjá mér. Hins vegar bauðst ég til að taka aukavaktina á morgun - en nú er Mogginn hættur að fara í frí á dögum eins og þessum, þ.e. sumardeginum fyrsta. Það er framför og eftirvinnutímarnir koma sér vel.

2002-04-24T15:34:00.000Z

Ég vísaði um daginn í grein um ólöglegar húsbyggingar í Kosovo (spennandi!) og fjallaði dálítið um þau efni. Fór að hugsa um þetta aftur í dag þegar fréttir tóku að berast um jarðskjálfta upp á 5,4 á Richter þarna á svæðinu. Raunar átti jarðskjálftinn upptök sín í Gnjilane þar sem ég starfaði og mér skilst að einn hafi látist þar og yfir 100 særst. Vinir mínir í Kosovo segja mér í tölvupósti að ÖSE-byggingin hafi verið rýmd í öryggisskyni og fréttaskeyti segja að enn séu allir í Gnjilane úti við, óttast semsé að fara inn, ef ske kynni að annar skjálfti væri væntanlegur. Og nei, nei, nei - það urðu víst skemmdir í miðbænum!

Þetta síðasta segi ég "tongue-in-cheek" - það eru örugglega ekki til margir ljótari bæjir en Gnjilane...

2002-04-23T20:06:00.000Z

Þetta er nú meira ruglið. Það er ótrúlegt að menn skuli enn sjá rautt þegar rætt er um Halldór Laxness. Ég ætla nú ekki að segja annað en það, að fyrir mitt leyti ætla ég ekki að elta ólar við skrif skáldsins um kommúnisma og Sovétríkin. Ótrúlegar nornaveiðar í gangi.

Um það hvort Gunnar Gunnarsson beri höfuð og herðar yfir önnur íslensk skáld á síðustu öld hlýtur maður einfaldlega að spyrja; hver fékk Nóbelsverðlaun og hver fékk þau ekki?

2002-04-22T19:55:00.000Z

Kosningaúrslit í Frakklandi hafa tekið við deilunni fyrir botni Miðjarðarhafs sem forsíðufrétt - a.m.k. í bili. Eðlilegt, enda stórtíðindi þar að gerast. En mikið getur lýðræðið annars komið manni í opna skjöldu!
Annars skrifar Egill Helgason ágætan pistil um þetta í dag.

X X X

Hér er áhugaverð frétt um þá hótun vestræns erindreka í Kosovo, Ivo Sanc, að birta opinberlega nöfn verktaka sem nýverið hafa hafið byggingastarf án þess að hafa til þess leyfi.

Málið er áhugavert ef maður þekkir forsöguna. Þannig er, að fyrrum frelsishetjur/skæruliðar Kosovo-Albana í UCK eru núna margir hverjir yfirmenn glæpamála í héraðinu. Frá því að stríðinu í Kosovo lauk 1999 hafa menn viljað ráða öllu sjálfir, byggja hús ef þeim sýndist svo o.s.frv. UCK hóf að byggja hús víðsvegar í Pristina, án þess að hafa nein leyfi til þess, en það er auðvitað lítið hægt að gera þegar menn standa frammi fyrir fait accompli... þ.e. húsið er einfaldlega risið áður en menn fá rönd við reist (og viðbragð alþjóðastofnana eins og Sameinuðu þjóðanna er nú ekki alltaf mjög skjótt).
Í fyrra bar það við að SÞ ætlaði að senda út af örkinni menn til að byrja niðurrif á húsum sem aldrei áttu að rísa og voru kannski byggð á lóð sem annar maður átti (t.d. Serbi - en Serbar geta lítt gætt hagsmuna sinna og eigna, flestir flúnir á brott). Lítið gerðist því þeir heimamenn sem fengu þetta verkefni var skjótt gerð grein fyrir því að þeir skyldu heldur halda sig á mottunni - fengu semsé morðhótanir.

En nú vill Ivo Sanc semsé hreyfa sig í málinu. Annars var mér ekki kunnugt um að Sanc væri kominn til Pristina. Hann var yfirmaður mála hjá SÞ í Gjilan/Gnjilane þegar ég var þar í vinnu fyrir ÖSE, en Gjilan er öllu minni borg, staðsett suðaustur af Pristina. Sanc virkaði vel á mig, þessi 2-3 skipti sem ég hitti hann (einu sinni í partý í Serbaþorpinu Silovo - við þurftum að vera alla nóttina í partýinu því útgöngubann gekk í gildi á miðnætti og ef þú komst þér ekki heim fyrir þann tíma þurftirðu að halda kyrru fyrir til fjögur).

En reyndar þekki ég af eigin raun hvernig menn virtu ekki alltaf lög og rétt í Kosovo. Leigusali minn þennan tíma sem ég bjó í Pristina (sem sé áður en ég fór til Gjilan/Gnjilane) var t.d. ekki mikið að hafa fyrir því að hafa samband við byggingafulltrúa þegar hann hóf endurbætur á sínu húsi, sem var stórt þriggja hæða hús í Dardane-hverfinu. Hann tilkynnti okkur að hann ætlaði að láta gera við þakið, sem lak. Svo hefjast framkvæmdir og mikið gekk á. Nema hvað. Er nokkrir dagar voru liðnir kom hann og sagði okkur að úr því að hann stæði í þessu, þá hefði hann ákveðið að bæta eins og einni hæð ofan á húsið!
Stóðu því framkvæmdir öllu lengur en ætlað var og var vitaskuld af því nokkurt ónæði. Ég er enginn verkfræðingur en mig grunar síðan einnig að það sé ekki einfaldlega hægt að byggja endalaust fleiri hæðir, hrynur það ekki á endanum?

2002-04-19T19:25:00.000Z

Meðan ég man - Stefán Pálsson er ekki sá eini sem fylgist með gengi Luton-manna. Ég held nú kannski ekki með þeim, en man samt ekki eftir öðrum eins leik og sigri Luton yfir Arsenal í deildarbikarnum vorið 1988. Held ég geti talið upp byrjunarlið Luton þann daginn, ef ég reyni. Spurning samt hvort ég skora ekki á Stefán að byrja. Svo man ég líka eftir leik þennan sama vetur sem var sýndur beint á RÚV en þar vann Luton Oxford 7-4 í ótrúlegum leik.

Samt held ég með Torquay United. Bara svo það sé alveg klárt.

2002-04-19T19:16:00.000Z

Er búinn að vera óvenju duglegur að lesa bækur undanfarna daga - skáldsögur og annað. Var að klára The Corrections eftir Bandaríkjamanninn Jonathan Franzen, en hann fékk National Book Awards á síðasta ári fyrir bókina. Móðgaði að vísu Oprah Winfrey, sem hafði valið þetta bók vikunnar, með því að neita að mæta í þáttinn hennar... en hann er ekkert minni maður í mínum augum. Man hins vegar eftir því að hafa séð einhvern þingmann froðufella, þegar ég var í New York í nóvember, yfir hrokanum í Franzen, á þessum tímum samheldni meðal Bandaríkjamanna.
The Corrections er þrælgóð, metnaðarfullt verk, en samt fannst mér vanta að maður gæti fundið til samkenndar með persónunum. Þær voru allar eitthvað svo gallaðar, breyskar.

Kláraði líka Atonement eftir Bretann Ian McEwan. Mér fannst hún svolítið tilgerðarleg. Hef verið að velta því fyrir mér hvort vaxtarbroddurinn í skáldsagnagerð á enskri tungu sé kannski vestur í Bandaríkjunum, en ekki í Bretlandi. Varð t.d. fyrir vonbrigðum með White Teeth eftir Zadie Smith, sem kom út fyrir tveimur árum, en Smith var mjög hampað á sínum tíma.
Á hinn bóginn var ég yfir mig hrifinn bók annars Bandaríkjamanns, Michaels Cunningham, The Hours, en sú hlaut Pulitzer árið 2000. Að ég tali nú ekki um Philip Roth, sem ég uppgötvaði í febrúar í fyrra. Þá fjárfesti ég í The Human Stain, sem kom út í hitteðfyrra, og týndi mér svo algerlega í henni að ég man ekki eftir annarri eins gleði... ja, ekki síðan maður var að lesa Pipp í sex ára bekk, Frank og Jóa í tíu ára bekk og Hammond Innes (miklu frekar en Alistair MacLean) í níunda bekk.

Ég þekkti Roth ekkert fyrir en á tímabilinu febrúar - október 2001 tókst mér að lesa einar átta bækur eftir hann og þær eru hver annarri betri. Allar bækurnar um Nathan Zuckerman eru snilld, einkum þær þrjár síðustu: The Human Stain, American Pastoral, I married A Communist - og síðan var ég afar hrifinn af Zuckerman Unbound... sem er samansafn þriggja bóka, sem komið höfðu út sitt í hverju lagi á níunda áratugnum.

Mér skilst hins vegar að Roth þyki dálítil karlremba - að bækur hans falli ekki alveg í kramið meðal femínista. Kemur ekki á óvart miðað við bækurnar Portnoy´s Complaint og Sabbath´s Theater... söguhetjurnar þar þjást sannarlega af kvenfyrirlitningu.

Ójá, það var lítið að gera í Kosovo, þegar maður var ekki að vinna! Verra var að rafmagnið fór af í tíma og ótíma - oft þurfti maður að lesa við kertaljós!

2002-04-18T17:47:00.000Z

Ber mér ekki annars skylda til að geta þess hvaðan ég fékk þá flugu í höfuðið, að byrja að krota á þessum vettvangi?
Nema hvað, af skyldurækni var maður að reyna að fylgjast með framgangi mála í kosningum til stúdentaráðs nú í febrúar... og það var semsé hið vaska Röskvufólk sem gaf fordæmið. Annars er það fyndið, ég var síðast á kosningavöku hjá Röskvu 1994 eða 1996 (ég var á Írlandi 1995) en það vildi svo til að ég var staddur á barnum þarna um daginn þegar Röskva tapaði meirihluta sínum eftir áralanga valdatíð!
Kannski maður sé ólukkutröll?
Nei annars - er ekki hjátrúarfullur. Blés t.d. á það, þegar ég var gjaldkeri Röskvu veturinn 1993-1994, er mér var skipað daginn fyrir kosningar að fara og leggja inn á reikning Strandakirkju. Það var víst einhver hefð fyrir því að heita á kirkjuna, líklega vannst fyrsti sigurinn þannig vorið 1991. Ég sagði að vísu engum frá því, að ég hefði sparað þessa aura, laug því að öllum að vitaskuld hefði ég borgað. Og það vannst sigur það árið, ef ég man rétt.

Þar með er það upplýst!!!!

Hitt er annað mál, að ég fann ekki til neinnar samúðar þegar tap var staðreynd að þessu sinni. Löngu kominn yfir alla nostalgíu hvað þetta varðar. Fannst það reyndar dálítið fyndið, hversu menn tóku þessu alvarlega. Svona er maður vondur.

2002-04-18T13:51:00.000Z

Merkileg myndin á bls. 26 í Mogganum í dag - af japönsku túristunum sem ekki höfðu hugmynd um að ófriðlegt væri um að litast þessa dagana í Betlehem, og hugðust skoða Fæðingarkirkjuna... þar sem ísraelskir hermenn hafa setið um ca. 250 Palestínumenn undanfarnar tvær vikur. Það eru ekki allir jafn vel með á nótunum...

Á maður annars ekki að vekja athygli á umfjöllun Kosovo-deildar ÖSE um eigið gæluverkefni?

2002-04-17T18:19:00.000Z

Ég vissi það svo sem, að Stefán Pálsson yrði ekki lengi að sjá að fyrirsögn þessara skrifa er sótt í ljóðið Easter 1916 eftir írska nóbelsskáldið W. B. Yeats (1865-1939). Veit ekki hvort Stefán er að hæðast að mér með ummælum sínum - en það væri þá ekki í fyrsta sinn sem hann gerði það!

Ég hef áður gert Yeats að umtalsefni, í grein sem birtist í Tímariti Máls og Menningar (nr. 1, 1999). Þó ég hafi svo sem ekki mikið vit á ljóðlist hafði sagnfræðingnum Roy Foster tekist að vekja áhuga minn á Yeats, í fyrirlestri sem hann hélt í Ulster Hall í Belfast vorið 1997. Nú líður að því að seinna bindi ævisögu Yeats, sem Foster hefur verið að vinna að um áraraðir, komi út.

Í kvöld ber manni sem endranær að horfa á The West Wing. Þó að þetta sé auðvitað bara sápa þá get ég ekki neitað því að ég hef gaman að þessu. Ekki bara af því að það er gaman að fá að kíkja bakvið tjöldin - meðal ráðgjafa við gerð handrita er DeeDee nokkur Myers, sem var talsmaður Bills Clintons Bandaríkjaforseta fyrstu ár hans í embætti - heldur líka af þvi að þeir hafa stundum fyrir því að taka á "alvöru" málefnum. Síðasti þáttur var t.d. þrælgóður, þar var verið að fjalla um það hvort Bandaríkjamenn ættu að fullgilda sáttmála Sameinuðu þjóðanna um stofnun (stríðs)glæpadómstóls... daginn eftir mætir undirritaður í vinnuna og fær einmitt það verkefni að skrifa frétt um að nú loksins hefðu nægilega mörg ríki staðfest sáttmálann til að dómstóllinn gæti tekið til starfa!
Tala um að vera með "aktúelt" efni - The West Wing stendur fyrir sínu. Ekki Bandaríkjamenn hins vegar - Bush er víst alls ekki á þeim buxunum að beita sér fyrir fullgildingu sáttmálans.

Það verður annars spennandi að sjá hvort það sé ekki farið að styttast í flugferð þeirra Radovan Karadzic og Ratkos Mladic til Haag. Þar eiga þeir auðvitað heima.

Annars var ég að kíkja á bloggið hans Sverris Jakobssonar. Vil ekki vera leiðinlegur við "fellow historians" en eftir nokkra íhugun ákvað ég að spandera alls ekki þessum rúmu sjö þúsund krónum í þátttöku á Söguþingi 2002 - átti nefnilega í stökustu erfiðleikum með að finna fyrirlestra sem ég hefði áhuga á að hlýða á. Er eiginlega orðinn hálf viðskila við þessa sagnfræði hér heima - en verð þó auðvitað í sagnfræðingatalinu, sem kemur víst út í maí.

2002-04-17T14:25:00.000Z

Ég sé að sumir nota þetta "blogg" sem eins konar dagbók, láta allt flakka og þjást ekki af feimni. Í sjálfu sér er þetta e.t.v. rétta leiðin en samt held ég að þetta hljóti að virka sem svona dagbók sem segir samt ekki allt, enda er sumt best geymt í kollinum.

Hvað um það - í dag vekur athygli mína nýr pistill á heimasíðu Eyþórs Arnalds sem fjallar um fullveldið og ummæli forseta vors, ÓRG, um þau mál í gær og fyrradag. Það er eitthvað óklárað við þá hugsun sem Eyþór er að reyna að koma á framfæri, eða er þetta bara illa prófarkarlesið?
Eftirfarandi texti er þó frekar gamaldags, að mínu mati, hljómar eins og eitthvað sem Jón Aðils hefði getað skrifað í upphafi aldar:
"Draumur Napóleons og Hitlers var að sameina Evrópu. Sjálfstæð ríki Evrópu streittust á móti. Vel má vera að ríki á meginlandi Evrópu sjái eftir þeim tíma þegar þau, hvert og eitt voru heimsveldi. Eingöngu með því að sameinast geta þau í stærðinni borið sig saman við Bandaríkin, Japan og Kína. Við sem höfum alltaf verið lítil þjóð og þurfum ekki að þjást af minnimáttarkennd stórþjóðanna. Við höfum sannað það að við getum búið lítið og snoturt, svo eftir sé tekið. Ísland hefur lifað tvö tímabil sjálfstæðis; fullveldis tímann og nútímann. Varla er það tilviljun að bæði tímabilin beri af hvað hagsæld og velsæld."

Ekki veit ég hvaða "fullveldistíma" hann er tala um, kannski þjóðveldisöld? Gott væri ef Eyþór setti sig inn í kenningar sagnfræðinga um þau mál, áður en hann heldur því fram að tímabilin tvö séu fullkomlega sambærileg.

Og ætla menn virkilega að fara að halda því fram að sjálfstæði sé forsenda þess að menn geti haft það gott? Írar eru sjálfstæð þjóð, gengu í EB árið 1973 og óhætt er að segja að efnahagsaðstæður hafi aldrei verið betri þar en einmitt eftir inngöngu (þó rétt sé að nefna að efnahagsmál Írlands tóku alls ekki við sér strax við inngöngu, það er í raun ekki fyrr en eftir miðjan níunda áratuginn sem það gerist). Nú geta menn haldið því fram að hagsæld Íra sé alls ekki ESB-aðild að þakka, hún hafi brostið á þrátt fyrir ESB-aðild. En þá hljóta menn um leið að viðurkenna að ESB-aðild (og þar með "ósjálfstæði" eins og Eyþór virðist túlka það) þarf ekkert endilega að vera þröskuldur fyrir hagsæld, velsæld?
Sjálfur tel ég að það geti í raun staðið í vegi framfara ef menn eru of uppteknir af sjálfstæðishugmyndinni. Sannarlega fannst mér, þann tíma sem ég dvaldi í Kosovo, að sjálfstæðisþráhyggjan lamaði allt frumkvæði meðal Albana, þar komst ekkert annað að og enginn hafði fyrir því að velta því fyrir sér hvort efnahagslegar forsendur væru fyrir því að Kosovo stæði eitt og sér. Svarið var alltaf: allt verður gott þegar við fáum sjálfstæði, en er spurt var hvaðan hið nýja sjálfstæða ríki ætlaði að afla tekna varð lítið um svör.
Tek ég þó fram að í þessu felst ekki mat af minni hálfu á því hvort Kosovo eigi að fá sjálfstæði eður ei.

Svo hlýtur nú líka að vera veigamikill munur á því sem Napóleon og Hitler reyndu að gera, og því sem gert hefur verið á vettvangi Evrópusamvinnu undanfarin fimmtíu ár eða svo. Má reyndar ekki ganga lengra og kalla það ósvífið að gera svona samlíkingu, gagnvart þeim mætu mönnum sem staðið hafa í brjósti fylkingar sameiningarferlisins með þá sannfæringu að leiðarljósi að þeir væru þar með að tryggja að aldrei framar yrði háð heimsstyrjöld á meginlandi Evrópu?

2002-04-17T00:28:00.000Z

Með þau frægu orð að yfirskrift skal haldið af stað - eigi getur maður eftirbátur Stefáns Pálssonar verið, eða hvað? Kannski veit hann hvaðan þau orð eru tekin?

2002-04-17T00:18:00.000Z

Með þau frægu orð að yfirskrift skal haldið af stað - eigi getur maður eftirbátur Stefáns Pálssonar verið, eða hvað? Kannski veit hann hvaðan þau orð eru tekin?